„თბილისში, საშუალო ხელფასი 1000-დოლარიან მიჯნას გადასცდა და თითქმის გაუთანაბრდა თურქეთის საშუალო ხელფასს“ – ამის შესახებ სტატისტიკოსმა სოსო არჩვაძემ მოსახლეობის აღწერის შედეგებზე საუბრისას განაცხადა.
„პოზიტიური ცვლილებაა ის, რომ გვაქვს ეკონომიკური ზრდა. კარგია, რომ თბილისში, საშუალო ხელფასი 1000-დოლარიან მიჯნას გადასცდა. ეს არის დაახლოებით იმდენივე, რამდენიც არის ჩვენი მეზობელი თურქეთის საშუალო ხელფასი.
ანუ თბილისი, სადაც ხელფასს იღებს დაახლოებით 350 ათასი ადამიანი, მათი ხელფასი გაუთანაბრდა თურქეთის საშუალო ხელფასს, რომლის ეკონომიკაც დაახლოებით 30-35%-ით უსწრებს საქართველოს განვითარებას. მაგრამ ხაზგასასმელია ისიც, რომ თბილისში ცხოვრობს მოსახლეობის მხოლოდ 34%.
რაც შეეხება რეგიონებს, მაგალითად, ბათუმში 1.5-ჯერ გაიზარდა მოსახლეობის რაოდენობა და თუ მოსახლეობის რაოდენობის დინამიკას შევადარებთ პირდაპირი უცხოიური ინვესტიციების რაოდენობას, აღმოჩნდება, რომ მაღალ კორელაციაშია, იმიტომ, რომ ინვესტიციების 90% მოდის თბილისსა და ბათუმზე.
ეს გარკვეულწილად ქმნის უკეთეს პირობებს წარმოებისთვის, ყოფისთვის და იმისთვის, რომ დანარჩენ რეგიონშიც თანაბრად გადანაწილდეს რესურსები. ცნობილია, რომ ჯაჭვის სიმყარე განისაზღვრება იმ ყველაზე სუსტი რგოლის სიმყარით, რომელიც ამ ჯაჭვში არის.
ამიტომ, თუ გვინდა, რომ ეკონომიკას ჰქონდეს მდგრადი და შეუქცევადი ხასიათი, აუცილებელია, რომ ყველაზე დეპრესიულ რეგიონებს მიექცეს განსაკუთრებული ყურადღება, მათ შორის სახელმწიფო სუბსიდიების გაზრდის ხარჯზე,“ – განაცხადა არჩვაძემ.
BPN
