კრიზისი არის ისტერიული, ტოტალური და ყოვლისმომცველი და ამას აჩვენებს, „დაღლილი“ ხალხის სახლში გასტუმრება. ვხედავთ ბიძინა ივანიშვილის პოლიტიკურ პარანოიას, რომელიც ერთ დღეში ღლის ადამიანებს. ბატონი ამ თავის ახალ აგონიაში როგორ სასჯელს დაუწესებს ამ ადამიანებს, ამას ვუყუროთ კარგი ფელეტონივით,- ამის შესახებ „ლელო-ძლიერი საქართველოს ერთ-ერთმა ლიდერმა თაზო დათუნაშვილმა სუს-ის ხელმძღვანელის გელა გელაძის გადადგომასთან დაკავშირებით განაცხადა.
თაზო დათუნაშვილი მიიჩნევს, რომ გრძელდება კლანური დაპირისპირება და „შავი ღრუბლების კამარა შეიკრა მამუკა მდინარაძის და მისი კლანის თავზე“.
„კრიზისი არის ისტერიული, კრიზისი არ არის უბრალოდ პოლიტიკური და კონცენტრირებული, კრიზისი არის ისტერიული, ტოტალური და ყოვლისმომცველი და ამას აჩვენებს, ეს რაღაც „დაღლილი“ ხალხის სახლში გასტუმრება, ისე, რომ თითქოს გუშინ აბსოლუტურად სრულ ჯანზე თანამდებობაზე არ იყვნენ, ერთ დღეში „იღლებიან“ და მერე მიდიან. გეკა გელაძემ რა აჩვენა კარგი ან ცუდი იმ რამდენიმე თვეს სუს-ის უფროსის თანამდებობაზე ყოფნისას, ეს ხომ არასერიოზულია – ვერც ცუდს გააკეთებდა და ვერც კარგს, რომ რაღაც გვეთქვა, რომ განგრძობადობაში კარგი ხელმძღვანელი იყო ან ცუდი ხელმძღვანელი იყო. ჩვენ ვხედავთ კლანური დაპირისპირების კიდევ ერთ ფაზას და ვხედავთ ძალიან ნათლად ბიძინა ივანიშვილის პოლიტიკურ პარანოიას, რომელიც ერთ დღეში ღლის ადამიანებს. დაიღალეთ -წადით! დაიღალეთ-წადით! ამას გაგრძელება, ალბათ, მოჰყვება, არ არის ეს ჰაერიდან მოტანილი ამბები, რასაც ჩვენ ვხედავთ ჟურნალისტურ გამოძიებებში. ჩვენ ნათლად ვხედავთ, რომ შავი ღრუბლების კამარა შეიკრა მამუკა მდინარაძის და მისი კლანის თავზე, ამიტომ ღმერთმა უწყის ბატონი ამ თავის ახალ აგონიაში როგორ სასჯელს დაუწესებს ამ ადამიანებს. თანამდებობიდან რომ მოაშორა, ეს ცხადია და აბა, გაგრძელება რა იქნება, ამას ვუყუროთ კარგი ფელეტონივით“, – განაცხადა დათუნაშვილმა.
*****
ეს არის მდინარაძის სახლში გაშვების გაგრძელება, რომელსაც შეიძლება, სხვადასხვა თანამდებობის პირები მიყვნენ – დაველოდოთ, ვინ იქნება შემდეგი, – ამის შესახებ „გახარია საქართველოსთვის” დეპუტატმა, გიგა ფარულავამ განაცხადა, რითაც გელა გელაძის მიერ სუს-ის ხელმძღვანელის პოსტიდან გადადგომას გამოეხმაურა.
მისივე თქმით, სახელმწიფოს ეროვნული ინტერესებისთვის საზიანოა, როდესაც ხელისუფლებას არ აქვს ერთიანი სტრატეგია და სუს-ის უფროსი ყოველ 6-7 თვეში იცვლება.
„ოცნების“ პირობებში, არც ერთს – როგორც მაღალი თანამდებობის პირს, ისევე, იმ ადამიანებს, ვისაც აქვთ საპასუხისმგებლო თანამდებობა, არავის აქვს იმის გარანტია, რომ კონკრეტულ თანამდებობას გარკვეული ვადით შეინარჩუნებს. დღეს იქნება თუ ხვალ დილით, ამ კონკრეტულ ადამიანებს შეიძლება თანამდებობების დატოვება მოუწიოთ – არა საკუთარი გადაწყვეტილებით, არამედ სხვა ადამიანის გადაწყვეტილებით. შეიძლება ვთქვათ, რომ ეს არის მდინარაძის სახლში გაშვების გაგრძელება, რომელსაც შეიძლება, სხვადასხვა თანამდებობის პირები მიყვნენ. დაველოდოთ, ვინ იქნება შემდეგი.
რა თქმა უნდა, ძალიან ნეგატიურად მოქმედებს, ზოგადად, ქვეყნის ინტერესზე, ეროვნულ უსაფრთხოებაზე, როდესაც სახელმწიფოს, პოლიტიკურ გუნდს, რომელიც ამდენი წელია ხელისუფლებას მართავს, არ აქვს ერთიანი ხედვა, ერთიანი სტრატეგია და ყოველ 6-7 თვეში იცვლება სახელმწიფო უწყების სამსახურის უფროსი. რა თქმა უნდა, ეს საზიანოა როგორც უშუალოდ ამ კონკრეტული ინსტიტუტისთვის, ისე სახელმწიფოს ეროვნული ინტერესებისთვის,” – განაცხადა ფარულავამ.
