რუსულმა ავიაკომპანია Red Wings-მა რუსეთის სხვადასხვა ქალაქიდან საკურორტო ქალაქ ბათუმის მიმართულებით ექვსი ახალი მარშრუტი აამოქმედა, განაცხადეს საქართველოში შვეიცარიის საელჩოსთან არსებული რუსეთის ინტერესთა სექციაში.
სექციის ინფორმაციით, რუს მოგზაურებს შორის ბათუმი, როგორც ზაფხულის პერიოდში დასვენების საყვარელი მიმართულება, სულ უფრო მეტად იმყარებს თავის პოზიციებს.
„მიმდინარე თვეში საქართველოს მთავარი კურორტის მიმართულებით რუსეთის ფედერაციის სხვადასხვა ქალაქიდან ექვსი ახალი მარშრუტი გაიხსნა. ამიერიდან ბათუმი პირდაპირი რეისებით დაკავშირებულია ვოლგოგრადთან, ორენბურგთან, პერმთან, სარატოვთან, ტიუმენთან და ჩელიაბინსკთან“, — ნათქვამია განცხადებაში.
საერთო ჯამში, 2026 წლის ზაფხულის სეზონზე ავიაკომპანია Red Wings-ი საქართველოში ფრენებს რუსეთის 15 ქალაქიდან განაახორციელებს.
