ევროკავშირი ჩქარობს, რომ რუსეთის წინააღმდეგ სანქციების 21-ე რაუნდზე შეთანხმებას მომავალი კვირის ბოლომდე მიაღწიოს. ახალი სანქციების პაკეტი შესაძლოა რუსეთის ნავთობის შემოსავლებს, მის ბანკებსა და „ჩრდილოვან ფლოტს“ ეხებოდეს, იუწყება გამოცემა Politico.
აღნიშნულია, რომ ერთ-ერთი მთავარი წინადადება შეიძლება იყოს რუსული ნავთობის ფასის შეზღუდვა. ამჟამინდელი „ფასის ჭერი“, რომელიც ბარელზე 44,10 აშშ დოლარს შეადგენს, ამ ზაფხულს იწურება. თუ არანაირი ქმედება არ იქნება მიღებული, ის ავტომატურად გაიზრდება.
ქვეყნები დაჟინებით მოითხოვენ ამჟამინდელი ფასის შეზღუდვას, რაც მოსკოვს ნავთობის ფასების ზრდით მიღებულ დამატებით შემოსავლებს დააკარგვინებს. თუმცა, დიპლომატებმა აღნიშნეს, რომ რუსული ნავთობის სრული აკრძალვა, ისევე როგორც საზღვაო გადაზიდვების შემოთავაზებული აკრძალვა, ნაკლებად სავარაუდოა.
ევროკავშირმა ასევე შეიძლება გააგრძელოს სანქციები რუსული ენერგეტიკული კომპანიების, „ლუკოილისა“ და „როსნეფტის“ წინააღმდეგ და ახალი სანქციები მოსალოდნელია რუსული „ჩრდილოვანი ფლოტის“ კუთვნილი გემებისა და მასთან დაკავშირებული სერვისების წინააღმდეგ.
გარდა ამისა, სანქციების სიაში, სავარაუდოდ, დაემატება რუსეთის მართლმადიდებლური ეკლესიის მეთაური, პატრიარქი კირილი, რომელიც ვლადიმერ პუტინის ახლო მოკავშირეა. პატრიარქის წინააღმდეგ სანქციების დაწესების წინა მცდელობა უნგრეთმა დაბლოკა.
