ჯანდაცვის მსოფლიო ორგანიზაცია რუსეთში, ირკუტსკის ჭირის საწინააღმდეგო კვლევითი ინსტიტუტის თანამშრომლებს შორის პნევმონიული ჭირის შესაძლო მეორე შემთხვევას იძიებს. ამის შესახებ ჯანმო-ს გენერალურმა დირექტორმა, ტედროს ადანომ გებრეიესუსმა, პლატფორმა X-ზე განაცხადა.
საერთაშორისო ჯანდაცვის რეგულაციების შესაბამისად, ჯანმო-ს მოთხოვნის საპასუხოდ, რუსეთის ხელისუფლებამ განაცხადა, რომ ირკუტსკის რეგიონში ბოლო დროს ჭირის არცერთი შემთხვევა არ დაფიქსირებულა.
რუსული მხარის მტკიცებით, ჩაატარა ეპიდემიოლოგიური გამოძიება, გაატარა პრევენციული და ეპიდემიის საწინააღმდეგო ზომები და გარდაცვლილებთან კონტაქტში მყოფი პირები სამედიცინო დაკვირვებისა და ტესტირების ქვეშ მოათავსა. მან განაცხადა, რომ კონტაქტებში საშიში პათოგენები არ აღმოჩნდა და მათი შემდგომი დაკვირვება უკვე დასრულებულია. თუმცა, ჯანმო-მ მოითხოვა დამატებითი ინფორმაცია გარდაცვლილი ქალის მძიმე პნევმონიის მიზეზის და კონკრეტული პათოგენის დასადგენად, რომელმაც ეპიდემიის საწინააღმდეგო ზომების შემოღება გამოიწვია. ორგანიზაცია ითხოვს განმარტებებს მედიის მიერ გავრცელებული ინფორმაციის შესახებ, რომლის მიხედვითაც, ინსტიტუტის მეორე თანამშრომელს უცნობი ეტიოლოგიის პნევმონიის დიაგნოზი დაუსვეს.
ისტორიულად, ომებმა შექმნეს ჭირის გავრცელების პირობები დიდი რაოდენობით ადამიანების გადაადგილების, სანიტარული პირობების გაუარესებისა და ეპიდემიის საწინააღმდეგო ზომების დარღვევის გამო. ჭირის აფეთქებები, კერძოდ, ჩრდილოეთის დიდ და რუსეთ-თურქულ ომებს ახლდა თან, ხოლო მეორე მსოფლიო ომის დროს იაპონიამ ჭირის გამომწვევი ბიოლოგიურ იარაღად გამოიყენა.
ჯანმომ ხაზგასმით აღნიშნა, რომ ინფორმაციის დროული, სრული და გამჭვირვალე გაზიარება აუცილებელია ურთიერთსაწინააღმდეგო ცნობების გასარკვევად და საზოგადოებრივი ჯანმრთელობის პოტენციური რისკების ზუსტად შესაფასებლად.
