ინგუშეთში დასრულდა 8 წლის ხიზირ დერბიჩევის სამძებრო ოპერაცია, რომელიც 8 დღის განმავლობაში უწყვეტად მიმდინარეობდა. მაშველებმა და მოხალისეებმა ბავშვის ცხედარი მდინარე სუნჟაში აღმოაჩინეს.
ტრაგედია 2026 წლის 15 ივნისს, ნაზრანის რაიონის სოფელ იანდარეში მოხდა. ხიზირ დერბიჩევი ორ მეგობართან ერთად მდინარის პირას იმყოფებოდა, როდესაც ერთ-ერთი ბიჭი ძლიერ დინებაში ჩავარდა და ტოტს მოეჭიდა. 8 წლის ხიზირი მეგობრის დასახმარებლად ადიდებულ მდინარეში გადახტა. მან მეგობრის გადარჩენა შეძლო (ბავშვი მოგვიანებით უფროსებმა ნაპირზე გამოიყვანეს), თუმცა, თავად ძლიერმა დინებამ გაიტაცა.
ბავშვის სამძებრო ოპერაციამ მთელი რეგიონი გააერთიანა. ძებნაში ჩაერთო ათასობით მოხალისე როგორც ინგუშეთიდან, ისე ჩეჩნეთიდან და მეზობელი რესპუბლიკებიდან. ადამიანები ერთმანეთს ანაცვლებდნენ მდინარის კალაპოტის დასაზვერად, სხვები კი მაშველებსა და მოხალისეებს საკვებითა და წყლით უზრუნველყოფდნენ.
პატარა გმირის ცხედარი 10 კილომეტრის მოშორებით იპოვეს იმ ადგილიდან, სადაც გადახტა. პატარა ხიზირმა საკუთარი სიცოცხლის ფასად შეძლო მეგობრის სიკვდილისგან ხსნა და რეგიონის ისტორიაში ნამდვილ გმირად დარჩება.
ambebi.ge
