რუსმა პროკურორმა მოკლული რუსი ოპოზიციონერი პოლიტიკოსის ბორის ნემცოვის ქალიშვილისთვის, ჟანასთვის, ხუთწლიანი პატიმრობა მოითხოვა, რომელიც ე.წ. არასასურველი ორგანიზაციის საქმიანობის ორგანიზებას ეხებოდა, იტყობინება Mediazona.
ნემცოვამ დაწერა, რომ საქმე უკავშირდება მის მუშაობას ბორის ნემცოვის თავისუფლების ფონდში, რომელიც მან 2015 წელს გერმანიაში დააარსა. რუსეთის ხელისუფლებამ ეს ორგანიზაცია არასასურველ ორგანიზაციად 2024 წლის აპრილში გამოაცხადა.
ბრალდების მხარის მტკიცებით, ნემცოვა ორგანიზაციის დაფინანსებასა და ფუნქციონირებას ორგანიზებას უწევს და „რუსეთის ფედერაციაში მიმდინარე სხვადასხვა მოვლენების უარყოფით დახასიათებას იძლევა“.
2026 წლის ივლისის ბოლოს, მოსკოვის ზამოსკვორეცკის რაიონულმა სასამართლომ ნემცოვა დაუსწრებლად დააკავა, ხოლო სექტემბერში მასზე საერთაშორისო ძებნა გამოცხადდა.
2026 წლის სექტემბერში, დემოკრატიისა და ლიბერალური ღირებულებების ფონდი (FDLV), რომელსაც ნემცოვა ხელმძღვანელობს, ასევე რუსეთში არასასურველ ორგანიზაციად გამოცხადდა. ოქტომბერში რუსეთის იუსტიციის სამინისტრომ ნემცოვა „უცხოელი აგენტების“ რეესტრში შეიყვანა.
რუსეთის ოპოზიციის ერთ-ერთი ლიდერი ბორის ნემცოვი 2015 წლის 27 თებერვალს, მოსკოვის ცენტრში, ბოლშოი მოსკვორეცკის ხიდზე მოკლეს. მკვლელობის შემკვეთები დღემდე არ არიან იდენტიფიცირებულნი. 2015 წლის ზაფხულში ჟანა ნემცოვამ რუსეთი დატოვა.
