სამი რუსული გემისგან შემდგარი „უჩვეულო კოლონა“, მათ შორის სუპერიახტა Graceful, რომელიც საერთაშორისო მედიის ცნობით, პუტინის პირად იახტას წარმოადგენს, დანიის სანაპიროსთან შენიშნეს. ამის შესახებ დანიური გამოცემა DR Verifier იტყობინება.
სუპერიახტას რუსული გამანადგურებელი და საპატრულო კატერი ახლავს. იახტის ტრანსპონდერი 2022 წლის 30 აგვისტოდან გამორთულია.
კვირა დილიდან, როგორც ამბობენ, დანიის საზღვაო ძალები და გერმანიის სანაპირო დაცვა მონაცვლეობით აკვირდებიან რუსულ კოლონას. სააგენტოს ცნობით, იახტის დანიშნულების ადგილი სტამბოლია.
გამოცემა აღნიშნავს, რომ სუპერიახტა „გრეისფული“ 2014 წელს აშენდა და პუტინის ვიზიტის დროს სოჭში შენიშნეს. 2021 წელს გემი ჰამბურგში რემონტდებოდა და ომის დაწყების შემდეგ, ალექსეი ნავალნის მოკავშირეების თქმით, „გრეისფული“ სასწრაფოდ კალინინგრადში გადაიყვანეს.
