რუსეთის მიერ იმპორტის აკრძალვის შემდეგ, ევროკავშირმა შესაძლოა სომხეთისთვის სავაჭრო წესები შეამსუბუქოს – წერს FT.
გამოცემის თანახმად, ევროკავშირი სომხეთისთვის საგანგებო სავაჭრო დახმარების ზომებს ამზადებს, რათა დაეხმაროს მას რუსეთის მიერ იმპორტის შეზღუდვების კომპენსირებაში, რადგან ბრიუსელი და მოსკოვი კავკასიური რესპუბლიკის მომავალზე გავლენისთვის იბრძვიან.
გეგმებთან დაკავშირებული ოთხი წყაროს ცნობით, ევროკომისია ე.წ. ავტონომიურ სავაჭრო ზომებს ამუშავებს, რომლებიც სომხურ სურსათისა და სოფლის მეურნეობის ექსპორტზე ტარიფებს შეამცირებს. ინიციატივა სომხეთის ბოლო არჩევნების წინ რუსეთის მიერ დაწესებული იმპორტის შეზღუდვების საპასუხოდ არის წარმოდგენილი, რომლებიც ბრიუსელის აზრით, ქვეყნის პროდასავლურ მთავრობაზე ზეწოლისკენ იყო მიმართული.
„ახლა დროა, რომ მათ დავუჭიროთ მხარი და ვაჩვენოთ, რომ შეგვიძლია ვიყოთ საიმედო პარტნიორები… მათ მეგობრები სჭირდებათ… ჩვენ კი ჩვენი მეზობლები უნდა დავიცვათ“, – განაცხადა ერთ-ერთმა წყარომ.
ორი წყაროს ცნობით, ეს ზომები, რომლებიც წევრი სახელმწიფოების უმრავლესობისა და ევროპარლამენტის თანხმობას მოითხოვს, მოიცავს რუსეთის აკრძალვებს დაქვემდებარებული დაახლოებით 20 კატეგორიის საქონლის უმეტესობას, რომელთა ღირებულება წელიწადში დაახლოებით 420 მილიონი ევროა. მათი თქმით, ბრიუსელი შეშფოთებულია, რომ მოსკოვმა შეიძლება ერევანზე სავაჭრო ზეწოლა გაზარდოს.
წინადადებები შესაძლოა რამდენიმე კვირაში წარადგინონ. ოფიციალური პირების ცნობით, ევროკავშირის საგარეო საქმეთა მინისტრებმა ეს საკითხი ორშაბათს ლუქსემბურგში სომხეთის საგარეო საქმეთა მინისტრთან განიხილეს. ევროკავშირის გაფართოების კომისარი მარტა კოსი ასევე მომავალი თვის დასაწყისში სომხეთს ესტუმრება.
ორივე ოფიციალურმა პირმა აღნიშნა, რომ კონიაკმა – სომხეთის ერთ-ერთმა მთავარმა საექსპორტო პროდუქტმა – გარკვეული სირთულეები შეუქმნა ევროკავშირის ოფიციალურ პირებს, რომლებიც დახმარების ზომებს ამუშავებენ, საფრანგეთისთვის კონიაკის წარმოების მნიშვნელობის გათვალისწინებით. ასევე არსებობს სირთულეები ზღვაზე გასასვლელის არმქონე ქვეყნიდან მალფუჭებადი საქონლის თურქეთის ან საქართველოს გავლით ტრანსპორტირებასთან დაკავშირებით.
