„თუ რუსეთი გადაწყვეტს ბაზის სომხეთიდან გაყვანას, ჩვენ წინააღმდეგი არ ვიქნებით“. „თუ ისინი გამოთქვამენ დარჩენის სურვილს, ჩვენ მზად ვართ ამაზეც ვისაუბროთ. თუმცა, ჩვენ არასდროს დაგვიყენებია ასეთი საკითხი“, – ამის შესახებ სომხეთის პრემიერმინისტრმა ნიკოლ ფაშინიანმა განაცხადა.
მისი თქმით, ბიშკეკში რუსეთის პრეზიდენტ ვლადიმერ პუტინთან შეხვედრისას სომხეთში 102-ე რუსული სამხედრო ბაზის ყოფნა არ განხილულა.
„სამხედრო ბაზასთან დაკავშირებით არანაირი განხილვა არ ყოფილა. ამ პერიოდში ეს საკითხი არასდროს დაგვიყენებია. და საქმე იმაში არ არის, რომ სომხეთში 102-ე სამხედრო ბაზის ყოფნას სასიცოცხლოდ აუცილებლად მივიჩნევთ“, – განაცხადა ფაშინიანმა ჟურნალისტებისთვის გამართულ ბრიფინგზე.
2 სექტემბერს გავრცელებული ინფორმაციით, რუსეთი სომხეთიდან, სადაც გიუმრიში რუსული ბაზაა განთავსებული, ხვალვე გავა, თუ ერევანი სამხედრო ბაზას არასაჭიროდ ჩათვლის, – ამის შესახებ რუსეთის პრეზიდენტმა ვლადიმერ პუტინმა განაცხადა.
„თუ სომხეთი მიიჩნევს, რომ რუსული სამხედრო ბაზა სომხეთში საჭირო აღარაა, ჩვენ ხვალვე გავალთ. მაგრამ, სომხეთი მზად არის ამისთვის? ჩვენ არავის არაფერს ვახვევთ თავს”, – განუცხადა პუტინმა ჟურნალისტებს.
102-ე რუსული სამხედრო ბაზა 1995 წლიდან ჩრდილოეთ სომხეთში, ქალაქ გიუმრიში მდებარეობს. 2011 წელს ბაზის რესპუბლიკაში ყოფნა 2044 წლამდე გაგრძელდა.
გამოიწერეთ “პრესექსპრესი”
