კატა ლარი, ბრიტანეთის პრემიერ-მინისტრის რეზიდენციის მთავარი თაგვების დამჭერი, აღფრთოვანდა იმ ინფორმაციით, რომ ახალი პრემიერ-მინისტრის ძაღლი ენდი ბერნჰემი მის ლონდონის რეზიდენციაში არ გადავა, არამედ მანჩესტერში დარჩება და ეთანხმება აზრს, რომ ის და ძაღლი ერთმანეთს ნამდვილად ვერ შეეწყობიან.
ბრიტანულ მედიასთან ინტერვიუში ბერნჰემმა განაცხადა, რომ მისი ძაღლი, პუდელის ნაჯვარი, სახელად აქსელი, სავარაუდოდ, მანჩესტერში დარჩება. მან ეს იმით ახსნა, რომ აქსელს შეუძლია „ბოროტი პატარა კაცივით“ მოიქცეს და ლარის ვერ შეეწყობა. ბერნჰემმა ასევე ხუმრობით თქვა, რომ ბრიტანული საზოგადოება ნაკლებად დააფასებს აქსელის მიერ ლარის სიმშვიდის დარღვევას.
თავშესაფრიდან აყვანილი ლარი 2011 წლიდან ბრიტანეთის პრემიერ-მინისტრის რეზიდენციაში მსახურობს.
კატები ბრიტანელი მმართველების რეზიდენციებში მე-15 საუკუნიდან ცხოვრობენ. თითქმის 100 წლის განმავლობაში, 1929 წლიდან, მათ ოფიციალური სტატუსი ჰქონდათ და წელიწადში 100 ფუნტ სტერლინგს იღებდნენ ხელფასს. XX საუკუნეში ამ ჯგუფის ყველაზე ცნობილი წარმომადგენელი კატა ჰამფრი იყო, რომელიც სამი პრემიერ-მინისტრის – მარგარეტ ტეტჩერის, ჯონ მეიჯორის და ტონი ბლერის – თაგვების დამჭერი იყო. ჰამფრი 2008 წელს, დაახლოებით 18 წლის ასაკში გარდაიცვალა.
გამოიწერეთ “პრესექსპრესი”
